Ang Sawikaan: Mga Salita ng Taon ay isang masinsinang talakayan para piliin ang pinakanatatanging salitang namayani sa diskurso ng sambayanan ng nakalipas na taon. Itinataguyod ito ng Filipinas Institute of Translation (FIT), isang samahang non-stock, non-profit na itinatag noong Setyembre 3, 1997 ng ilang manunulat at tagasalin na naniniwalang kailangan na itampok ang pagsasalin bilang mahalagang bahagi ng kultura at gawaing pang-akademya.

Sa isang pulong ng samahan noong Pebrero 2004, iminungkahi ang pagtataguyod ng proyekto para piliin ang pinakamahahalagang salita ng taon. Ang mungkahing ito ay inspirado ng proyektong Word of the Year ng American Dialect Society (ADS), isang samahan na itinatag noon pang 1889 at nakatuon sa pag-aaral ng wikang Ingles sa Hilagang Amerika at iba pang mga wikang iniimpluwensiyahan nito at nakaiimpluwensiya dito. Taon-taon, simula 1990, nagdaraos ang ADS ng pulong sa Estados Unidos, at isa sa mga gawain nila rito ay ang talakayin at piliin ang pinakanatatanging salita o parirala na lumaganap sa loob ng taon. Ilan sa mga itinanghal nilang salita ng taon ay ang information superhighway (1993), cyber at morph (1994), web at newt (1995), Mom (1996), millenium bug (1997), ang hyphenated prefix na e- (tulad halimbawa sa e-mail, e-commerce, e-business, e-tailing; 1998), Y2K (1999), chad (2000), 9-11 (2001), at weapons of mass destruction (2002). Noong 2003, napili nila ang metrosexual, salitang tumutukoy sa isang “fashion-conscious heterosexual male” bilang salita ng 2003. Naniniwala ang FIT na ang ganitong pamimili ng salita ng taon ay isang malikhain at mabisang estratehiya para tawagin ang ating pansin sa dinamiko at demokratikong katangian ng Filipino, ang ating wikang pambansa.

Ang salita ng taon ay pinipili mula sa mga nominadong salita na resulta ng aming panawagan sa mga mag-aaral, guro, iskolar, propesyonal, at iba pang may interes sa wika sa loob at labas ng akademya na magsumite ng inaakala nilang mahalaga at natatanging salita na namayani sa diskurso ng sambayanang Filipino. Bagaman ang layunin ay magtampok ng mga salita sa loob lamang ng isang taon, isinaalang-alang na rin ang ilang salitang matagal-tagal nang lumaganap dahil sa nagsisimula pa lamang naman ang proyekto. Sa mga susunod na Sawikaan, ang mga salitang lumitaw sa loob ng isang taon lamang ang makakabilang sa pagpipilian.

Isang lupon na bubuuin ng mga opisyal at kasapi ng FIT, kasama ang ilang makawika, ang pipili ng mga finalist. Ang naglahok ng salita ay hihilingan na maghanda ng maikling sanaysay upang mailahad ang mga ebidensiya kung bakit dapat tanghalin ang isang nominadong salita bilang Salita ng Taon. Ihaharap ang mga sanaysay na ito sa isang pagtitipon ng mga kasapi ng FIT, mag-aaral, guro, iskolar, at iba pang masugid na tagasubaybay ng pag-unlad ng pambansang wika. Ang mga tagapagtaguyod ng salita ay binigyan ng laya na sila mismo ang magbasa ng kanilang sanaysay o pumili ng ibang tagabasa para siyang gumawa ng presentasyon ng salita.